# 👍"रंगाची दुनिया-'अनुभवाचे बोल !":👌

 👍👍👍👍💐💐

"रंगांची दुनिया":
"रसिकमनांची रसिली यात्रा.....

👍"अनुभवाचे बोल !":👌
💐"नियतीची किमया !!":💐
"लहानपणी शाळेत किंवा घरी केव्हा ना केव्हा तरी प्रत्येकाला हा प्रश्न विचारला जातो 'तो पुढे मोठा झाल्यावर कोण होणार?' मग प्रत्येक जण आपआपल्या कुवतीप्रमाणे वा स्वप्नातील इच्छेप्रमाणे मत व्यक्त करत असतोः मास्तर, कंडक्टर, इंजिन ड्रायव्हर, इंजीनियर, डॉक्टर वा अभिनेता वगैरे वगैरे !

पण पुढे तसं होतच असं नाही. असं कां होतं, हा प्रश्न प्रत्येकाने विचारात घेण्याजोगा आहे. प्रत्येकाचं आयुष्य आणि जीवनरेखा कसा मार्ग घेईल हे कोणीच कुणाला सांगू शकत नाही. मागे वळून पाहताना पुष्कळदा अनेक निर्णय चुकलेले वाटतात, तर कधी कधी अवचित असं वळण येतं की, त्यामुळे संधी मिळून, जे घडणार नाही तेही घडून जातं.

ह्या सगळ्यामागे एक मोठं गुढ आहे. परिस्थिती त्यानुसार निर्णय आणि कृती अथवा वागणं त्यातून निर्माण होणारी फलनिष्पत्ती अथवा फळ म्हणजे अर्थातच नवीन परिस्थिती, ही साखळी सातत्याने माणसाच्या आयुष्यात मार्गक्रमणा करत असते. त्याचं त्याला त्यावेळी काही लक्षातही येत नाही, परंतु या सगळ्या चार-पाच बाबींमागे एक अदृष्य शक्ती बहूदा असते आणि तीच कदाचित सगळ्या या साखळीला योग्य ती दिशा दाखवत असते. ती अदृश्य किंवा गुड शक्ती म्हणजे नियती अथवा नशीब होय.

कोणी मानो वा न मानो, प्रत्येकाच्या आयुष्यात नशिबाच्या खेळीचा प्रभाव सातत्याने पडलेला दिसतो. अजून तरी कुणालाही त्या नशिबाच्या अथवा नियतीच्या रुपाचे, प्रभावाचे योग्य ते विश्लेषण करता आलेले नाही. हीच तर जीवनाची गंमत आहे ! सारे गुढ अदभूत व अगम्य. म्हणूनच कदाचित प्रत्येकाचे आयुष्य म्हणजे एक सुरस चमत्कारिक अशी कादंबरी असते, असे म्हणतात.
---------------------------
👍"अनुभवाचे बोल !":👌
😊 "आशा वा निराशेचा खेळ !"😢
"अपेक्षा आणि जबाबदारी या जुळ्या बहिणी असाव्यात, कारण एक आली की, तिच्या पाठोपाठ आपोआप दुसरी येते किंवा दुसरी जर अंगावर पडली, तर आपोआप पहिली आलीच आली. ह्या लपंडावाच्या खेळापासून माणसाची सुटकाच नाही.

एकमेकींवर अवलंबून असणाऱ्या अपेक्षा आणि जबाबदारी ह्या भावना, माणसाच्या जीवनात सातत्याने त्याच्या मागे लागलेल्या असतात. त्यामुळे त्याचे काम होते किंवा होतही नाही. सहाजिकच अपेक्षाभंग अथवा समाधान ह्याही भावना त्यांच्या परिणामांवर अवलंबून असतात.

शक्यतोवर आपल्या अपेक्षा पूर्ण करण्यासाठी जी जबाबदारी आपोआपच आपल्यावर येते, ती कसोशीने प्रामाणिकपणे व निष्ठेने कष्ट घेऊन पार करणे, हे सातत्याने प्रत्येकाचे कर्तव्य असते. पण सध्याच्या एकमेकांवर अवलंबून असणाऱ्या जगामध्ये, हे साधतेच असे नाही. कारण ज्याच्याकडून आपण अपेक्षा करतो, तो योग्य ती कृती न करता जबाबदारी टाळतो आणि दुसऱ्याला मनस्ताप होतो. माणसांच्या समस्यांचे, सुखदुःखाचे मूळ हे अपेक्षेनुसार जबाबदारी पूर्ण करण्यावर अवलंबून आहे."
--------------------------
👍"अनुभवाचे बोल !":👌
# "सोशल मिडीया" वरील कोणतेही पोस्टींग शेअर वा फाँरवर्ड करण्यापूर्वी प्रथम त्याची सत्यता आजमावली जाणे अत्यावश्यक आहे. तशी खात्री पटल्यानंतर त्याची उपयुक्तता ज्यांना असू शकते, त्यांनाच ते शेअर वा फाँरवर्ड करावे. आले पोस्टींग, न पूर्ण वाचता, केले शेअर वा फाँरवर्ड असे कधीही करू नये.

# कोणत्या गोष्टींना केव्हा व कां प्राधान्य द्यावयाचं आणि कोणत्या गोष्टींना दुर्लक्षित करावयाचं, हे ज्यांना अचूक जमतं, तेच परिस्थिती हवी तशी बदलू शकतात.
---------------------------
धन्यवाद
सुधाकर नातू