#👍"वाचा, फुला आणि फुलवा !":👌

 👍👍👍👍💐💐

"रंगांची दुनिया":
"रसिकमनांची रसिली यात्रा.....💐

👍"वाचा, फुला आणि फु़लवा !":💐

👍"ज्याच्या हाती पुस्तक"
लेखकः जाँन गोन्सालविस.:👌

फक्त पुस्तक वाचूनच आनंद मिळतो असे नाही, तर पुस्तक प्रकाशन समारंभाचा जो व्रुत्तांत असतो त्यातूनही आगळेवेगळे समाधान मिळू शकते. असा अनुभव मला "शब्द' रूची" एप्रिल'२२ चा अंक वाचताना आला. त्यामध्ये अंकाच्या शेवटी विविध पुस्तक प्रकाशन समारंभांबद्दल मनोरंजक माहिती दिलेली होती. त्यातून अनेक पुस्तकांबद्दल उद्बोधक कल्पना आपल्याला येऊ शकते आणि आपल्या जाणिवांचा भवताल अधिक विस्तारित होतो.

या अंकामध्ये एका आगळ्यावेगळ्या पुस्तकाच्या प्रकाशना संबंधी माहिती आहे. प्रत्यक्ष वाचनसवयी संबंधात हे पुस्तक आहे. त्याचे शीर्षकही मोठे आकर्षक असे आहे "ज्याच्या हाती पुस्तक" असे त्याचे शीर्षक आहे, किती अनुरूप असे हे शीर्षक आहे ! नेहमी आपण "जिच्या हाती पाळण्याची दोरी, ती जगाला उद्धारी !"असे म्हणत असतो. तसेच "ज्याच्या हाती पुस्तक, त्याची ज्ञानकक्षा विविधस्पर्शी" ! असा अनुभव हे पुस्तक वाचल्यानंतर येऊ शकतो.

या पुस्तकाचे शीर्षक आगळेवेगळे आणि प्रेरणादायी आहे. कारण त्यामध्ये अभ्यासू, जातिवंत चोखंदळ, बहुश्रुत असे आदर्श वाचकांचे विविध पैलू पुस्तकात उलगडून दाखवले आहेत. वाचन संस्कृतीवर लिहिलेले हे पुस्तक, त्यावरून लेखकाच्या अफाट आणि चौफेर वाचनाच्या सवयीचे दर्शन घडवते. वाचनाविषयी तसेच एकंदर जीवनाविषयी महान असे विचारधन या पुस्तकात आहे.

या पुस्तकात काय काय नाही ! अनेकविध अशा विषयांना स्पर्श त्यामध्ये केलेला आहे, बालकवींचे काव्य, खांडेकरांचे तत्वज्ञान, कुसुमाग्रज अर्थात
वि वा शिरवाडकर यांचा क्लिष्ट विषय सोपा करून सांगण्याची पद्धत, पु ल देशपांडे यांचे नर्मविनोद इ.इ. अशी २६ प्रकरणे या पुस्तकात आहेत. विविध भाषांतील वेगवेगळ्या, भूभागातील, त्याचप्रमाणे अनेक लोकप्रिय साहित्यिकांच्या पुस्तकांचा अभ्यास करून, त्यांची वैशिष्ट्ये जणु अर्काच्या स्वरूपात या पुस्तकात व्यक्त केलेली आहेत. प्रकाशन समारंभाच्या विवेचनावरून मला जाणवले की, हे एकच पुस्तक जरी कोणी वाचले, तरी त्याला अनेक ग्रंथ वाचल्याचे ज्ञानसमाधान मिळू शकेल !

--------------------------------------------------------
👍"चाकोरी मोडणारे पुरुष"
लेखक हरीश सदानी.:👌
याच "शब्द रुची" अंकामध्ये अजूनही एका चाकोरीबाहेरच्या विषयाला स्पर्श करणाऱ्या पुस्तक प्रकाशन समारंभाची माहिती दिली आहे. जगामध्ये खूप लोक असे आहेत की, जे वेगळ्या प्रकारची कामे करत आहेत. त्यांचे काम हे त्यांच्या ध्यासाचा परिचय करून देत असते. त्याची दखल होणाऱ्या बदलांवर अवलंबून असते. हा बदल लहान स्वरूपात असेल, याचे उद्याचे स्वरूप व्यापक असेल अशी अपेक्षा त्यात अंतर्भूत असते. त्यासाठी विलक्षण चिकाटी, जिद्द ,परिश्रम व पदरमोड लागते. तिथे कुठलीही स्वार्थ भावना नसते, केवळ आणि केवळ एका ध्यासापायी ही मंडळी अहोरात्र झपाटल्यासारखी कामे करत असतात. अनेक विरोध व सहकार्य अपमान यांनाही सामोरे जावे लागले, तरी ती मंडळी विचलित होत नाहीत. कुणी दखल घेतली, न घेतली तरी पुढे जात राहतात. अखेर शेवटी अशी वेळ येतेच की, जाणकार होणाऱ्या बदलाची दखल घेतली जाणे.

"चाकोरी मोडणारे पुरुष", लेखक हरीश सदानी. या पुस्तकात असे पुरुष आहेत की, जे आपली पुरुषप्रधान संस्कृती वेगळ्या वळणावर आणू पहात आहेत आणि तसा प्रयोग करणाऱ्या संस्थेचे संबंधी येथे उद्बोधक अशी माहिती दिली आहे. काय आहे ही पुरुषप्रधान संस्कृती हे आज आपल्याला सर्वांनाच ज्ञात आहे. प्रत्येक पुरुष नांवाच्या बाळासोबत ती जन्माला येते आणि आयुष्यभर तिलाच घट्ट करण्यात सार्थकता सिद्ध होत राहते. पण हे कुणाविरुद्ध तर जिच्या पोटी जन्म घेतला, त्या स्त्री विरुद्ध जणू काही ती असते !

जिच्या पोटी जन्म घेतला ती स्त्री केंद्रस्थानी मानून, तिच्या जन्मापासून तिच्या अखेरच्या श्वासापर्यंत स्त्री-पुरुष हे समान पातळीवर आहेत, हे वास्तव स्वीकारण्याची कोणाचीही तशी तयारी नसते. म्हणजेच ही संस्कृती लिंगभेद यावर अवलंबून आधारित आहे. अशा भेदाभेदाची मजबूत भिंत, ज्यांना अमान्य आहे अशा निष्ठावंत कार्यकर्त्यांचे काम, त्यासाठी चाललेली त्यांची मनस्वी लढाई याचा परिचय या पुस्तकात दिलेला आहे. सहाजिकच त्या पुस्तकाचे शीर्षक "चाकोरी मोडणारे पुरुष" हीच त्याची ओळख म्हणायला हवी

स्रीयांचे अस्तित्व, त्यांचे प्रश्न वेगळे आहेत. त्यांचे विश्व, भावभावना संवेदना देहबोली वेगळी आहे. हे समजून मोकळेपणाने त्यावर चर्चा करणे, उपाय सुचवणे, आपसातला संवाद मोकळा करून अधिक व्यक्त करण्यास संधी देणे, स्त्री-पुरुषांना समानतेच्या पातळीवर आणून, माणूस म्हणून आपण सगळे सारखेच आहोत, यात जात धर्म वर्ण लिंग असा कुठलाही भेद नाही. आपसातले नाते समान पातळीवर आणायचे आणि त्यासाठी पुरुषांनीच पुरुषांचा अहंकार घालवण्यासाठी लढा केलेला आहे आणि त्याचाच, अशा पुरुषांचा शोध लेखकाने त्यांच्या कार्यासहित येथे मांडला आहे. अशा पुरुषांच्या मानसिकतेचा शोध देखील घेतलेला आहे. तो असाः "स्त्रीशी निरामय नाते निर्माण करण्यासाठी कटिबद्ध असलेल्या पुरुषांना जाण आहे की त्यांच्यातील पुरुषसत्तेने घालून दिलेल्या वर्चस्ववादी प्रवृत्तीपासून ते पूर्णपणे मुक्त नाहीत"

याचबरोबर ते आशा व्यक्त करतात 'लिंगभेद मिटवून स्त्रियांचं जगणं अधिक सशक्त, समृद्ध, सुरक्षित करण्याबरोबरच पुरुषांच जगणंही माणूसपणाच्या वाटेकडे जाण्यासाठी हे पुस्तक प्रेरित करते. सावित्रीच्या लेकी वाढण्याबरोबरच, ज्योतिबाचे लेकही समाजात निपजायला हवेत.

या दोन आगळ्यावेगळ्या पुस्तकांसंबंधी मला जे जाणवले, ते मी येथे व्यक्त केले आहे. ते प्रकाशन सोहळे जणु माझ्या नजरेसमोर उभा राहिले आणि त्या दोन्ही पुस्तकातील सारे भावविश्व उभे केले गेले.

धन्यवाद
सुधाकर नातू