#👍"रंगांची दुनिया-टेलिरंजन !": 😊"अब जमाना बदल रहा है !"👌

👍👍👍👍💐💐
"रंगांची दुनिया":
"रसिकमनांची रसिली यात्रा.....💐

👍"टेलिरंजन !":👍"जमाना बदल रहा है !":😢
मराठी मालिका आता वयात आलेल्या आहेत, असे दिसते. कारण "मन उडू उडू झालं" मधील दीपिका आणि इंद्रा किंवा "कन्यादान" मधील समीर आणि ओवी तसेच व़ेधा व तिला फसवत असलेला विवाहीत तरूण या युगुलांच्या जोड्या, एकमेकांबद्दलच्या आकर्षणाचे जाहिर प्रदर्शन, बिनदिक्कतपणे नको इतकी जवळीक साधत असलेले दिसतात. त्यातील समीर आणि ओवीचं, एक वेळ आपण समजू शकतो, दोघांचा विवाह तरी झालेला आहे. परंतु दीपिका आणि इंद्रा तर बँकेच्या आँफिसमध्येसुद्धा बिनधास्त नाचतात काय- ती परमनंट झाल्याबद्दल ! सारे नवलच !! ऑफिसमध्ये असे धांगडदिंगे केलेले चालतात वाटतं ? त्यातून त्यांचा विवाहही अजून झालेला नाही आणि दीपिकाच्या पालकांकडून-विशेषतः वडिलांकडून परवानगीच नाही मिळणार. तरीही या युगुलाचे जे सातत्याने जवळिकीचे प्रसंग दाखवले जातात, हे कितपत योग्य ? अर्थात कुणाला ही बुरसटलेली विचारसरणी आजच्या काळात वाटू शकेल. "जमाना बदल रहा है ! इथे कुणाची कुणाला काही पर्वा नाही, असे म्हणून आपण निमूटपणे हे सारे प्रकार पहात राहायचे किंवा रिमोट वापरायचा, दुसरे काय !
------------------
👍"पसंद बदल रही है !":😊
"प्रेक्षक नव्या कथांच्या शोधात" असे एक स्फूट वर्तमानपत्राच्या पुरवणीमध्ये वाचले. त्याचा सारांश इतकाच की, 'कोरोना' काळानंतर बॉलीवूडचे जे चित्रपट प्रकाशित झाले, ते दिग्गज कलाकार असूनही बॉक्स ऑफिसवर एका पाठोपाठ एक आपटत आहेत "कोरोना"काळात प्रेक्षकांनी 'ओटीटी'वर जगभरचे अनेक भाषांमधले चित्रपट पाहिले. यामुळे त्यांची आवड-निवड बदलली आहे हेच खरे.

हिंदी बॉलीवूड चित्रपटांची ही कथा, तीच बहुदा ऐतिहासिक पार्श्वभूमी असलेले चित्रपट वगळता, मराठी बोलपटांची देखील आहे वा असावी. यासंदर्भात सोशल मीडियावर एक मजेशीर संदेश वाचण्यात आला. त्याचा मतितार्थ असा होता की, दोन मित्र अमूक एक चित्रपट खूप गाजतोय या जाहिरातीमुळे, आगाऊ ऑनलाईन बुकींग करून चित्रपटगृहात जेव्हा गेले, तेव्हा ते दोघं आणि अजून दोन-चार फुटकळ प्रेक्षक वगळता संपूर्ण थिएटर रिकामे होते ! काहीही अवास्तव जाहिरात करायची आणि वास्तव मात्र वेगळेच हे यावरून म्हणायचे. थोडक्यात प्रेक्षकांना आवडेल असे काहीतरी मिळाल्याशिवाय कुठलाही बोलपट बॉक्स ऑफिसवर हीट होणं अशक्य आहे.
------------

👍"कशासाठी, कुणासाठी हे 'खेळ !":😢
फ्रान्स मधील "कान्स आंतरराष्ट्रीय फिल्म फेस्टिवल"मध्ये "गोदावरी" हा मराठी चित्रपट गाजला अशीही एक बातमी वाचली. यासंदर्भात आंतरराष्ट्रीय चित्रपट महोत्सवात जे चित्रपट निवडतात, गाजतात, ते कधी प्रदर्शित होतात? प्रत्यक्ष प्रेक्षकांना चित्रपटगृहात जाऊन बघायला मिळतात की नाही यावर शंका यावी. हा 'गोदावरी' चित्रपट कधी चित्रपटगृहात आला, याचे मला तरी स्मरण नाही. अथवा तो कधी प्रकाशित होणार या संदर्भातही काही माहिती वाचल्याचे स्मरत नाही. हे अशा बोलपटांबद्दलचे प्रकार म्हणजे, हसावे की, रडावे, हेच कळत नाही. कारण चित्रपट केवळ आंतरराष्ट्रीय फेस्टिवलसाठी निर्माण केला जातो कां? प्रेक्षकांसाठी हा एक यक्षप्रश्नच ! या साऱ्या खटाटोपातून वाटतो. 'क्लासेस' जे आवडते, ते 'मासेस'ना बिलकुल आवडत नाही, असे म्हणावयाचे दुसरे काय !
-------------------
☺️"माकडचाळ्यांचा 'स्वाभिमान !":😢
"निहारिके बरोबरचा साखरपुडा, शांतनुने नको इतका तमाशा करुन मोडल्यावर, स्वाभिमान मालिका बेलगाम भरकटत चाललेली दिसते. महाविद्यालयात म्हातार्या सुरक्षा रक्षकाच्या वेषांत ह्या प्राध्यापक महाशयांनी पल्लवीच्या मागे हात धुवून वेड्यासारखे मागे लागण्याचा जे माकडचाळे केले ते पहाता ही मालिका ताबडतोब बंद व्हावी असेच कुणाला वाटेल !"😢
------------

😊 "मोठा गाजावाजा करून, ढोल बडवत "झी मराठी"वर आणलेला "बँड, बाजा बरात" हा कार्यक्रम भावोजींच्या 'होम मिनिस्टर'चीच ( फसू शकणारी ?) संकरित आव्रुत्ती वाटू लागली आहे !"☺️
----------------
😊"पुरे झाला हा खेळखंडोबा !":😢
इतके महिने उत्कंठापूर्ण असलेली "आई कुठे काय करते" ही मालिका आता कशीही भरकटत फरफटत नेली जाताना पहाणे ही शिक्षा वाटू लागली त्यासाठी प्रथम अनिरूद्ध नंतर कांचन आजी ह्यांना बेलगाम उरफाटे चीड येईल असे वागायला लावले आणि हे कमी झाले म्हणून अखेर संजनाची सम्रुद्धी बंगला हडपण्याचा मीर्च मसाला घातला गेला. अप्पांचे कांचनच्या भयानक बोलांमुळे घर सोडणे सर्वांनी मिनतवारी करून त्यांना घरी परत आणण्याचा फार्स व आता कांचन आजीच्या वाढदिवसाच्या नांवाखाली वेळकाढूपणा. आता त्यात भर आशुतोष चा एक्सीडेंट तो कोमात जातो की काय हा भयग्रस्त स्वप्नाचा पोरखेळ त्यानंतर त्याने आपोआप शुद्धीवर येणे ..... ह्या सार्यामुळे ही मालिका आता एकदाचा आशुतोष व अरूंधतीचा विवाह उरकून बंद करून टाकणे शहाणपणाचे ठरेल.😢
--------------
😢"मुकी बिच्चारी !":😢
कोवळ्या वयातील मुलामुलींना विशेषतः मुलींना अभिनयाच्या खेळात गुंतवून मालिका फुलवायचा फंडा वा ट्रेंड नको इतका बोकाळत चाललेला आहे. "तुझी माझी रेशीम गांठ" "रंग माझा वेगळा" दुर्गा आणि आता "तुझेच गीत मी गात आहे मध्ये तर अशा मुलामुलींचा जणु कळपच ! ....ह्या मालिकात बच्चे कंपनीला वेठीस धरलेले दिसते. बालवयात हे त्यांच्यासाठी कितपत हितावह आहे, ह्याचा गांभीर्याने विचार व्हायला हवा...
------------

धन्यवाद
सुधाकर नातू