"स्विकारा, नित्य बदल":

 "स्विकारा, नित्य बदल":

हवाहवासा वाटणारा गुलाबी हिवाळा, तो संपतो न संपतो तोच रखरखीत असा तापदायक उन्हाळा, असे हे ऋतुचक्र युगानुयुगं चालू आहे. म्हणजे बदल हाच निसर्गाचा नित्यनियम आहे. काही चांगलं, तर काही त्रासदायक, काही सुखदायक, तर काही दुःखदायक अशा तर्‍हेचे विविध अनुभव घेणं हेच तर जीवन असतं. म्हणूनच सुखदुःख ही आलटून-पालटून येत असतात. सगळ्यांचे सगळेच आयुष्य काही दुखी किंवा सुखी समाधानी नसते. प्रत्येकाच्या जीवनाची वाटचाल, ही त्याच्या त्याच्या नशिबाने म्हणा, प्रारब्धाने म्हणा ही अगदी आगळी वेगळी असते.

कुठे होतो आणि कुठे आलो, विचार करता करता पण त्यातून एक साधलं, ते म्हणजे आपल्या सभोवताली जे घडत असतं, ते आपल्याला अनुभवायला येत असतं. ते जसंच्या तसं स्वीकारणं आणि पुढे जाणं हाच खरा पुरुषार्थ आहे.

स्थितप्रज्ञ व्हा, हे जे भगवान श्रीकृष्णाने सांगून ठेवलयं, ते खरोखरच अनुकरणीय आहे. अशी द्रुष्टी येणं, असा स्वभाव बनणं, निश्चित कठीण आहे. पण ते तसं आपल्याला जमलं, तर आपले जीवन अधिक संतोषजनक होईल.
---------------------------
# "हवे, कर्तव्याचे उत्तरदायित्व":

"सद्दस्थिती चिंताजनक अशीच झाली आहे. एकीकडे नित्य वाढत्या अपेक्षा, दुसरीकडे संधींचा दुष्काळ आणि त्यांत भर म्हणून मतलबी स्वार्थी राजकारण, हेही पुरेसे नाही म्हणून की काय, अनियंत्रित नोकरशाही, ढासळती प्रशासकीय गुणवत्ता व कारभार अशा चक्रव्यूहात शास्वत, सर्वसमावेशक विकास पुरता अडकला आहे.

जो पर्यंत सर्वच क्षेत्रात, समस्त स्थरांवर विहीत कर्तव्ये आणि त्यासाठीचे प्रत्येकाचे उत्तरदायित्व समाधानकारकरित्या पूर्ण करण्याची ईर्षा निर्माण होत नाही, तोपर्यंत उत्तरोत्तर भवितव्य अंध:कारमय होत जाणार हे निश्चित.
----------------------------

"भ्रष्टाचाराचा भस्मासूर":

# लक्ष्मी चंचल असते,तिची देवाण घेवाण सतत चालू असते. लक्ष्मी चंचल असते व हे चक्र न थांबणारे असते. लक्ष्मी नेहमी स्वकष्टांतून, प्रामाणिक मार्गाने यावी. ग़ैर मार्गाने कष्टांशिवाय आलेली लक्ष्मी कधीही चांगली नाही; अशी लक्ष्मी सुख शांती देत नाही. हाच निसगॅ नियम आहे,जो जणु Newton चा पहिल्या नियमानुसार आहे. "करावे, तसे भरावे".

सध्याची अशांतता, ताणतणाव, हिंसा विध्वंसक वातावरण हा भ्रष्टाचाराने बरबटलेल्या मार्गांनी येत असलेल्या लक्ष्मीचा परिणाम आहे. कारण अशा व्यवहारांत एका बाजूला कर्तव्याचा विसर, फ़क्त हाव असते, तर दुसर्या बाजूला अगतिकता असते. कोण, कसा केव्हा थांबवणार, भ्रष्टाचाराचा हा विदारक भस्मासूर?
----------------------------
कां?: अमक्याचा खास अमूक दिवस?":
"एक मार्केटिंग फंडा"?

आज ह्याचा उद्या त्याचा, अमुकच एक, खास दिवस निवडण्याची संकल्पना कुणी शोधली व कां? वर्षातील तशा दिवसांची एकत्रितपणे माहिती कुठे मिळते?

अशा तर्हेचे प्रश्न मनात येणे सहाजिकच आहे. त्यामागचा शोध एका निकटवर्तीयाने घेतला आणि तो मला जसा समजला, तो असा आहे:

"मूलतः काही दिवस 'मदर्स डे' सारख्या विशिष्ट क्रुतज्ञता मनापासून व्यक्त करण्याच्या प्रेरणेमुळे नियुक्त केले गेले. परंतु अमुक अमक्याचा “दिवस” हे सर्व फॅड मुख्यतः "हॉलमार्क हॉलिडे" ह्यावरून सुरू झाले असावे.

हॉलमार्क ही एक ग्रीटिंग कार्ड कंपनी होती आणि बर्‍याच अमक्याचे “दिवस ” ह्यांचा शोध त्याद्वारे काटेकोरपणे लावला गेला. जेणेकरून नवीन ग्रीटिंग कार्ड आणि केक गिफ्टसारख्या नवीन व्यवसाय विक्रीचे उत्पन्नांत वाढ होणे शक्य झाले. अमुक जणांचे अमुकच खास दिवस ही संकल्पना मोठ्या प्रमाणावर विस्तारित होत गेली. अगदी काही दशकांपूर्वी जरी 'मदर्स डे' स्थापित झाला असला तरी ऐकला नव्हता. पण अशा खास दिवशी किती व्यवसाय होतो हे पहा!

आणि मग बर्याच संस्था किंवा कंपनीचे विशिष्ट विभाग इत्यादींनी स्वतःच्या विशिष्ट ओळखीसाठी अशा “दिवस” संकल्पनेची एक नियमितपणे प्रथाच सुरू केली. आणि आता .... जसे की ते म्हणतात की ह्या प्रकारे वर्षामध्ये जणु ३६५ पेक्षा अधिक विशिष्ट "दिवस" असावेत हे कदाचित वास्तव आहे!

ह्या "खास राखून ठेवलेल्या अमुकचा हा दिवस ह्या संकल्पनेमुळे उगाच भावविवश व्हायचे कारण नसावे. हे फँड सध्याच्या बाजाराभिमुख जीवनशैलीचा मार्केटिंग फंडा आहे, दुसरे तिसरे काहीही नाही.

सुधाकर नातू