👍"छाप (पड)लेले शब्द !":👌 👍"मॅजेस्टिक गप्पा-सुखाचा लपंडाव !":👌

👍"छाप (पड)लेले शब्द !":👌 👍"मॅजेस्टिक गप्पा-सुखाचा लपंडाव !":👌 💐"पुण्यामध्ये जशी 'वसंत व्याख्यानमाला' किंवा महाविद्यालयी 'रानडे वक्तृत्व स्पर्धा' विलक्षण लोकप्रिय आहेेत, त्याचप्रमाणे पुण्यातच प्रारंभ झालेली आणि आता मुंबईमध्ये एखाद दुसरा अपवाद वगळता दरवर्षी सातत्याने साजरी होणारा 'मॅजेस्टिक गप्पा' हा कार्यक्रम तितकाच रसिकमान्य होत आला आहे. विविध क्षेत्रातील नामवंतांनी येथे हजेरी लावत आपापल्या विचारांची अनुभवांची आणि कार्यकर्तृत्वाची ओळख ह्याच 'गप्पां'मधून करून दिली आहे. त्यामुळे मॅजेस्टिक गप्पांचे ते वर्षातून एकदा येणारे आठवडाभराचे दिवस खरोखर सर्वांनाच हवेहवेसे असतात. मी देखील अगदी आत्तापर्यंत न चुकता पार्ल्याच्या 'मॅजेस्टिक गप्पां'मधील मला आवडत्या क्षेत्रातील सेलिब्रिटींचे प्रत्यक्ष दर्शन घ्यायला आणि मनोरंजक अनुभव ऐकायला आवर्जून जात असे तसेच सोबत असणाऱ्या पुस्तक प्रदर्शनालाही भेट देणे एखाद्या व्रता सारखे करत असे. माहीम ते ट्रेनने पार्ले आणि कार्यक्रम संपल्यावर रात्री साडेनऊच्या सुमारास ट्रेनने परत घरी ! घर ते माहीम स्टेशन व पार्ला स्टेशन ते लोकमान्य सेवा संघ, जिथे मॅजेस्टिक गप्पा भरल्या जातात असा अर्ध्या पाऊण तासाची तंगडतोड देखील सहजतेने निभावत असे. परंतु आता ते शक्य होत नाही. मग अशा वेळेला वृत्तपत्रातून येणारी त्यासंबंधीची माहिती अगदी आवर्जून वाचतो. सोबतचे 'सुखाचा लपंडाव' या विषयावर दोन दिग्गज डॉक्टरांनी-सर्जन डॉ रविन थत्ते आणि डॉ नंदू मुलमुले यांनी सुखाची व्याख्या आणि सुख कसे मिळवता येते आणि प्रत्येकाला सुख मिळवणे, कसे शक्य आहे, यासंबंधीची सर्वंकष ओळख आपल्या बोलण्यातून परिणामकारक रीतीने रसिकांपुढे मांडली. मेडिकल सायन्स व मानसशास्त्रीय दृष्टिकोनाप्रमाणे व्यावहारिक जीवनातील वास्तवते बद्दल सुख म्हणजे काय ते शोधण्याचा मार्ग त्यांनी दाखवला. हे सारे वाचत असताना मला जाणवले एक महत्त्वाचे तत्त्व- सध्या 'घेणे' हे 'देण्या'पेक्षा नको इतके वाढले आहे आणि कदाचित हल्लीच्या असमाधान व अस्वस्थता यांचे कारण हे हावरट्सारखे ओरबाडून घेणे आहे. त्या उलट आपल्यापाशी आहे ते भरभरून 'देणे' घेण्यापेक्षा खूप खूप आवश्यक आहे. कारण त्यातून तुम्ही दुसऱ्याला आनंद देत असता आणि अशावेळी होणारा तुम्हाला मिळणारे समाधान, आनंद हा अद्वितीय असतो. ते अनमोल सुख कसे, हे विशद करणार्या कविवर्य श्री दत्ता हंसनीकर यांच्या गाजलेल्या कवितेच्या पंक्तीच माझ्या नुकताच वाचनात आल्या होत्या: 💐💐💐💐💐💐💐💐 II ज्यांची बाग फुलून आली त्यांनी दोन फुले द्यावी ज्यांचे सूर जुळून आले त्यांनी दोन गाणी द्यावीत II II ज्यांच्या अंगणी ढग झुकले त्यांनी दोन ओंजळी पाणी द्यावे आपले श्रीमंत ह्रदय त्यांनी रिते करून, भरून घ्यावे II II आभाळाएवढी ज्यांची उंची त्यांनी थोडे खालीच यावे मातीत ज्यांचे जन्म मळले त्यांना उचलून वरती घ्यावे II 💐💐💐💐💐💐💐💐 सुखाचा शोध आपण अविरतच घेत राहणार. लक्षात ठेवायला हवे की, जे घडते ते स्वीकाराला हवे त्याच्याशी जुळवायला हवे. कविवर्य बोरकरांच्या शब्दात 'जे घडले तेच पसंत !' थोडक्यात, जे आपल्यापाशी नाही, त्याचे दुःख करण्यापेक्षा जे आपल्या वाट्याला आले आहे, त्यातच सुख मानणे हेच खरे आत्मसमाधान होय ! 'मॅजेस्टिक गप्पां'च्या रूपाने मनामध्ये जे विचारमंथन झाले, ते येथे मोकळेपणाने मांडले आहे !":💐 धन्यवाद सुधाकर नातू